FAITE VOLUNTARIO! ESPERÁMOSTE NO FAMILIA EDUCA DE FOZ

Neste segundo ano da nosa campaña “En San Aníbal, buscamos o teu apoio. Faite voluntario”, queremos dar continuidade pero tamén un novo impulso ao realizado no 2023. Farémolo, iso si, dun xeito ben distinto, tratando de chegar a un público diferente e usando, ademais, distintas canles.

O noso obxectivo nos meses de setembro e outubro de 2024 é realizar unha campaña que dea saída a través das nosas redes sociais e páxina web (e que, a ser posible, sexa recollida polos medios de comunicación da nosa comarca) a tres diferentes vídeos de curta duración (entre 3 e 5 minutos como referencia) que brinden aos seus receptores, dun xeito atractivo, as posibilidades que teñen de facer voluntariado connosco.

Temos xa o primeiro deses tres vídeos promocionais. Está adicado ao Espazo de Preservación Familiar San Aníbal Familia Educa. Trátase dun servizo gratuíto de prevención e formación no eido educativo e socio familiar. A súa finalidade é dotar tanto aos menores como aos seus proxenitores das ferramentas socio educativas e psicosociais necesarias para un axeitado desenvolvemento da vida familiar no seu conxunto.

Con este vídeo, queremos transmitir aos posibles voluntarios o tipo de actividades que poderían realizar e o tipo de usuarios e entornos que temos no noso traballo do día a día.

Ogallá que te animes a botarnos unha man!!!